Из Лаврентьевской летописи

В лето 6493. Иде Володимер на болгары с Добрыною с воем своим в лодьях, а торки берегом приведе на коних, и победи болгары. Рече Добрына Володимеру: "Соглядах колодник, оже суть вси в сапозех; сим дани нам не даяти, поидем искать лапотников". И створи мир Володимер с болгары, и роте заходиша межю собе, и реша болгаре: "Толи не будеть межю нами мира, елико камень почнет плавати, а хмель почнет тонути". И приде Володимер Киеву.

В лето 6628. Ярослав ходи на половци за Дон, и, не обрет их, воротися опять, и Георги, брат его, ходи на болгары, и взя полон мног, и полк их победи.

В лето 6672... иде князь Андрей на болгарьг, с сыном своим Изяславом, и с братом своим Ярославом, и с муромьскым князем Гюргем; и поможе им бог и святая богородица на болгары: самех исекоша множьство, а стягы их поимаша, и одва в мале дружине утече князь болгарьскый до великаго города; князь же Ондрей воротися с победою, видев поганыя болгары избиты, а свою дружину всю сдраву... и шедше, взяша град их славный Бряхимов, а переди 3 городы их пожгоша.

В лето 6680... Toe же зимы посла князь Андрей сына своего Мстислава на болгары, и муромскый князь сына своего, и рязанъскый князь сына своего, бысть нелюб путь всем людем сим, зане непогодье есть, зиме воевати болгар, и подуче, не идяху. Бывшю же князю Мстиславу на Городьцы [75] совкупльшюся [со] братома своима, с муромьскым и с рязаньскым, на усть Окы, и ждаша дружины 2 недели, и, не дождавше, ехаша с переднею дружиною; Борису Жвдиславичю воевода бе в то время и наряд весь держаше; и въехаша в поганыя без вести, взяша сел 6, семое город, мужи исекоша, а жены и дети пойма. Слышавше же болгаре в мале дружине князя Мьстислава пришедша, [и] идуща опять с полоном, доспеша вборзе и поехаша по них в 6000, за малым не постигоша их за 20 верст князю Мстиславу на устьи с малою дружиною, а всю дружину пустившю от собе; и взврати от него бог поганыя болгары, хрестьяны покрыв рукою своею.

В лето 6692. Иде Князы Всеволод на болгары [и] приде в землю Болгарьскую; и высед на берег, поиде к Великому городу и ста у Тухчина городка, и перестояв ту 2 дни, поиде на третий день к Великому городу, сторожем наперед ездящим; оттоле же Белозерскый полк отряди к лодьям, а воеводьство да Фоме Лазковичу. Пошедшю же князю в поле, узреша наши сторожеве полк в поли, и мняху Болгарьскый полк: и приехаша 5 муж ис полку того, и удариша челом перед князем Всеволодом, и сказаща ему речь: "Кланяются княже, половци Емякове, пришли есьмы со князем болгарьскый воевать болгар"; князъ же Всеволод, здумав с братьею своею и с дружиною, води их в роту в Половецьскую, пойма их, поиде к Великому городу, и перешед черемисан в 1 день, наряди полкы, а сам поча думати с дружиною. Изяслав же Глебович, внук Юргев, доспев с дружиною, возма копье, потче к плоту, кде бяху пеши вышли из города, твердь учинивше плотом; он же вгнав за плот к воротам городным, изломи копье, и ту удариша его стрелою сквозе броне под сердце и принесоша иле жива в товары. Болгаре же из города из Собекуля и из Челмата поидоша в лодьях, а из Торцьскаго на коних, на лодье наши, и приехавше им на лодье наши же божьею помощью укрепляеми поидоша противу им; они же видевше побегоша, а наши погнаша, секуще поганыя бохмиты, и прибегшс к Волзе (вскакаша) в учаны, и ту абье опровергоша учаны, и тако истопоша более тысячи их, божьим гневом гоними... Князь же Всеволод стояв около города 10 дни, видев брата изнемогающа, и болгаре высладися бяху к нему с миром, поиде опять к Исадом; и ту на Исадех бог поя Изяслава, и вложиша и в лодью; князь же Всеволод взвратися во Володимерь, а коне пусти на мордву, а Изяслава привезше, положиша и у святое богородици Володимери.

 

 

© Copyright 2017. "Историческая библиотека"