Из Львовской летописи

Того же месяца марта 21 [7057 г.] прииде весть царю великому князю, что в Казани царь казанскый Сафа Кире умер, убился в своих хоромех. И посадили казанцы и крымцы соединачася на царьство казанское сына его Утемишь Гирея царевича дву лет, а в Крым послали многих послов просити помочи и сверстнаго царя. И царя великого князя казакы Урачко с товарищи послов казаньскых побили, и ярлыкы их поймали, и к государю прислали, и в Крым никаково человека не пропустили. Того же лета, иулиа 6, прислал ко царю и великому князю ис Казани Утемишь Кирей царь своего человека Бакшанду з грамотою, а писал о миру; и царь и великый князь послал к Утемишь Кирею царю свою грамоту з Бакшендою же, а писал: похочеть миру, и он бы прислал добрых людей.

...А с царем и великым князем шел царь Шигалей и царевич, и князь Иван Феодорович Мстиславской, и князь Петр Михайлович Щенятев, князь Семен Иванович Микулиньской, и иные князи и дворяне царева двора. Февраля 12 [7058 г.] сырные недели в вторник, царь и великый князь пришел к городу Казани со всем воинством и велел стати о кош о града Казани: сам стал царь и великый князь у Бакана озера, а царю Шигалею и большому полку велел стати против города на Арском поле, и передовому полку, а за рекою Казанию против града царевичю Едигерю и правой руке да и левой руке да и сторожевому полку, а наряду большему, на усть Булака против города, а другому наряду велел стати против города у Поганово озера. И воевод розставил, и туры [31] велел поделати, и к городу приступати. Ино пришло в то время нестроение, ветры сильные и дожди великые и мокрота немерная, и из пушек и из пищалей стреляти не мощно, и ко граду приступати невозможно за мокротою. Царь и великый князь стоял у города 11 ден, а дожди по вся дни быша, и теплота и мокрота великая, речкы малые попортило; а иные многие и прошли, а приступати к городу за мокротою не угодно. И царь и великый князь, видев такое нестроение, пошел, от града Казани прочь, в вторник на зборной неделе, февраля 25; теплоты ради наряду будет большего вести назад нельзе, с нарядом велел перед собою итти, и большему полку, и левой руке, и сторожевому полку; и шли вперед царя и великого князя. И пришед царь и великый князь на Свияжское устие, да стал.

П. С. Л., т. XX, ч. 2, стр. 475, 477.

 

 

© Copyright 2017. "Историческая библиотека"