Из Львовской летописи

И нача государь с своими бояры мыслити, како Казанью промышляти, и призывати почал казанскых князей, которые ис Казани приехали к нему служити, Кострова князя с товарищи, и почал мыслити, чтобы городь поставити на Свияжском устие, на Круглой горе; и сам бо государь, от Казани едучи, видел, што то место стройно и пригоже быти городу. И посылаеть государь по царя Шигалея, и царь к государю приехал; и государь призываеть братию свою князя Юрия и князя Владимера, и царя Шигалея, и всех бояр своих, и князей казаньскых, и светуеть государь з братьею, и со царем, и з боляры, и со князъми; и умыслил государь город поставити на Свияге на устие, на Круглой горе, промеж Щучиа озера и Свияги рекы, и рать свою послати в судех многую и конную, да запасы свои царьскые посылати великые да и вперед к его приходом готов тот запас...

...И начинаеть государь и делу касается, призываеть к себе диака своего Ивана Григориева сына Выродкова, и посылаеть его и с ним детей боярскых на Волгу, во Углецкой уезд, в Ушатых вотчину, церквей и города рубити и в судех с воеводами на низ вести... Месяца априлиа отпустил царь и великый государь в судех: в большом полку царя Шигалея, преже бысть казаньской, а воевод в большом полку государь со царем отпустил... а с ними многие люди дворяня царя и великого князя, изо многих гopoдов дети боярские [32], да казанские князи и мырзы, Костров князь, да Чапкун, да Бурнаш с товарищы, 500 человек; много бо их тогда бяше у государя. А города ставити и вперед в городе быти воевод своих государь отпустил… велел им город поставити на Свияжьском устие, на Круглой горе, за дватцать верст от Казани...

...А полем государь велел итти из Мещеры князю Дмитрею Ивановичю Хилкову. А из Новагорода из Нижнего велел государь итти изгоном на Казанской посад князю Петру Серебреному, а с ним дети боярские и стрельцы и казаки. А с Вятки велел принта Бахтеяру Зузину с вятчаны на Каму; да сверху Волгою государь прислал многых казаков, а велел стати по всем перевозом по Каме и по Волге и по Вятке реке, чтобы воиньскые люди ис Казани и в Казань не ездили. А из Мещеры послал государь полем пеших казаков на Волгу, Севергу да Елку, а с ними 2500 казаков; а велел им, пришедши на Волгу, суды поделати да поити вверх по Волге воевати казаньскых мест, и приити им велел к воеводам же... А пришел на Казаньской посад того же месяца 18... не со всеми людьми: многие люди заблудилися, мгла бо велика тогда бысть на Волге. А на посад пришел безвестно и божею милостью побил многих людей, и живых поимали, и полону руского много отполонили, а князей и мырз великых больши ста убили, и многых мелкых людей, и жен и робят побили...

...Месяца маиа 24, в неделю всех святых, царь Шигалей и воеводы пришли на Свиягу, и вылесчи воеводы великого князя из судов, начаша лес сечи, где быти городу; и очистя гору, пев молебнаа, и воду освятя, и со кресты по стенному месту обошли и обложили город, и церковь в городе заложили во имя рожества пречистыя и чюдотворца Сергия; велия чюдеса содеяшеся. Город же, который сверху привезен, на половину тое горы стал, а другую половину воеводы и дети боярскые своими людьми тотчас зделали: велико бо бяше место. И свершили город в четыре недели. Горние же люди [33] видев то, что город царя православнаго стал в их земле, и начаша ко царю и воеводам приезжати и бити челом, чтобы их государь пожаловал, гнев свой отдал, а велел бы им быти у Свияжского города и воевати их не велел. Царь же и воеводы послали то государю сказати, что город дал бог ставять, а князь Петр Серебряной с посаду пришел, а побил многых людей казанцов, а великого князя людем не велик изрон был, а горние люди государю хотять служили. Царь с тем прислал дворецкого своего Шабаса князя Шамова, а бояре Ивана Феодорова сына Шишкина. И после того пришла ко царю Шигалею от все горние стороны бити челом, чтобы им ослободил ехати бити челом ко царю государю великому князю; и царь и воеводы послали к государю горних людей Магмета Беззубова да Ахкубека Тогаева с товарищи, а с ними послали Григориа Семенова сына Плещеева. И Магмет с товарищи государю били челом ото всее горние стороны, от князей и мурз, и сотных князей, и десятных, и чювашей и черемисы и казаков, чтобы им государь гнев свой отдал, а велел бы у Свияжского города быти; и правду государю на том по своей вере дають, что им от государя и их детем неотступным быти, и к Казани от Свияжского города никак не отложитися; и пожаловал бы их государь в ясакех полегчил, и дал бы им жаловалную свою грамоту [34], как им вперед быти. И государь их пожаловал, гнев свой им отдал, и воевати их не велел, и взял их к своему Свияжскому городу, и дал им грамоту жаловалную з золотою печатаю, а ясакы им отдал на три годы; да Магмета с товарищи пожаловал великым жалованьем, шубами и деньгами.

 

 

© Copyright 2017. "Историческая библиотека"