Из Львовской летописи

Тоя же осени [7056] умыслил: царь и великый князь Иван; Василиевич всеа Руси с митрополитом и з братиею и з боляры итти на своего недруга на казаньского царя Сафа Кирея и на клятвопреступников казанцов за их клятвопреступление... А из Мещеры велел итти царю Шигалею, да с ним воеводам князю Володимеру Воротынскому и иным, а велел им с собою сниматися на устие Цывельском.

...А из Новагорода поиде на своего недруга на казанского царя Сафа Кирея и на клятвопреступников на Казаньскые земли людей февраля 2 [7056]... и начевал на Ельне, от Нижнево Новагорода 15 верст, а назавтрие в пятницу, прииде на остров Роботку. И некоим смотрением божиим прииде теплота велика и мокрота многая, и весь лед покры вода на Волзе, и пушки и пищали многие проволяшеся в воду: многая бо вода речная на лед наступи и никакоже по леду никому поступити невозможно; и многие люди в продушинах потопоша, занеже под водою продушин не знати. И стоял царь и великый князь на острове Роботке три дни, ожидая потнаго шествия, и никакоже не обретеся. Царь и великый князь отпустил х Казани болярина своего и воеводу князя Дмитреа Феодоровича Вельского и иных своих воевод многих со многими людьми: и велел им, снявся с Шигалеем царем, итти х Казани, а сам царь и великый князь возвратися к Новугороду Нижнему со многими слезами, что не сподобил бог его к путному шествию. И прииде в Нижний Новгород февраля 10, а на Москву царь и великый князь прииде месяца марта 7 день. Воеводы же царя и великого князя съидошася со царем Шигалеем на усть Цывелии, на зборной недели в пятницу, февраля 18, и приидоша к городу х Казани. И царь казаньскый со многими людьми встретил царя Шигалеа и воевод великого князя на Арском поле; и в передовом полку был тогда князь Семен Микулинской с товарищи, и передовым полком наступил, и казанскых людей многих побил, а самого царя в город втопташа. И стояша около града Казани семь ден воюя. А на том бою изымали Азика богатыря и иных многих. И возвратишася от Казани царя великого князя воеводы, дал бог, все здравы...

П. С. Л., т. XX, ч. 2, стр. 473—474.

 

 

© Copyright 2017. "Историческая библиотека"