Из Львовской летописи

Августа 23 [7060 г.] поиде государь к городу Казани. Пошел государь с Тереньузека, урядя полкы, к городу, а велел итти ертоулу[46] князю Юрью Шемякину да князю Феодору Троекурову, а с ним стрельцы и казакы пеши перед полки; такоже пред всеми полкы головы стрелецкие, а с ними их сотцкие, всяко своим стом идеть, и с казакы, розделяяся и атаманы с сотцкыми по чину; такоже передовому полку и большему полку, царю Шигалею и воеводам, на Арское поле вверх Булака у Кабана озера, а правой руке велел ниже города за Казань реку, а левой руке и сторожевому полку велел стати против города за Булаком. А сам государь пошел за большим полком, а за собою велел итти наряду и сторожевому полку и левой руке...

О вылазке из города казанских людей. И как пошли к городу, и казанцы вылезли многие люди конные и пешие, и обоим, християном и татарам, биющеся крепце на много время, и из пушек по граду и по воротам безпрестани бьюще, и стрельцы из пищалей, такоже из города из пушек и из пищалей стреляху, и бысть сеча велия и преужасна, от пушечното бою и от пищальнаго грому и от гласов и вопу кричания от обоих людей, от трескоты оружий и не бысть слышати другу друга глаголаннаго, бысть яко гром велий и блистание от множества огня пушечнаго и пищальнаго стреляниа и дымнаго курения. И богу помогающу православным, одолеваху безбожных, и множество побиша татар, и в град вбиша их, и мосты градцкие наполнилися мертвых. И сташа головы стрелетьцкие с стрельцы и головы з боярскими людьми и казакы по рву града и стреляху ся и с пищалей и из луков; а князь Михайло Иванович утверди туры и землю насыпаша за 50 сажен от города, от реки от Булака и по ворота, против всего города с приступных мест, и велить головам всех людей отвести к турам, и перед турами веляше стрельцом и казаком против города закопатися во рвы. Из города же вылазя биющеся и до полунощи приходящи к турам и биющеся, и за рукы имаяся...

О побиение татар на Арском поле. Того же месяца августа 30, в вторник, умыслил государь послати на тех людей, которые с лесу на полкы приходить на царские и на кормовщиков, и посла государь болярина своего и воеводу князя Александра Борисовича Горбатого да боярина князя Петра Семеновича Серебренаго, а с ними головы своего полку царского з детьми боярскими и стрелецкие головы, стрельцы и дети боарские головы многие з боарскими людьми; и велел князю Александру на них прямо с Арскаго поля приити, а князю Юрью Ивановичю Шемякину з детьми боарскими своим полком, да пешне же стрельцы и боарские люди и мордва, — тем государь велел итти от Казани рекы, как им князь Александр Борисович по времени весть подасть, так князю Юрью напустити. И как князь Александр Борисович вышел со всеми людьми, а пеших всех от Кобана озера послал лесом, татарове же увидев князя Александра, и вышли многие люди из лесу конные и пешие; и веляше князь Александр к ним немногим приближитися, татарове же вси устремишася на бой...

О послании во град Казань. В град же благочестивый царь посылаеть единого от приведенных татар, з грамотою, а пишеть к ним, чтобы государю царю великому князю били челом, и государь всех пожалуеть; а не учнуть бити челом, и государь тех живых, кои пойманы живы, велить бити. Граждане же не учиниша ответу, и царь их пред градом приведчи, велел всех побити.

 

 

© Copyright 2017. "Историческая библиотека"