Из Казанского летописца

Царь же и князь великий облехши Казань и объехав около града, и смотряше стенные высоты и мест приступных, и увидев удивися необычной красоте стен крепости града. Прежде бо приходил в зимнее время, тем и не расмотрив града гораздо, каков есть. Прележит бо к нему с востока поле, зовомо Арское, велико и красно, по нему же течет под град Казань река, на том же поле изливается езеро, Кабан именуемо, от града за три версты, и рыбу многу имущи в себе на пищу человеком, из него же истекает Булак река, в Казань реку под градом втекает, грязна вельми и топка, а не зело глубока; с полудню же града, от Булака и до Волги, красный луг Царев, на седмь версть продолжаятся, травою многою зеленяся и цветы красяся. Град же Казань зело крепок вельми, стоит на месте высоце, промеж двою рек Казани и Булака и согражден в седмь стен, в велицех и толстых древесех дубовых; в стенах же сыпан внутри хрящ и песок и мелкое каменье; толетина же градная от рек, от Казани и от Булака, трех сажен, и те бо места ратным неприступныи. И вода двема рекама бы страну града обтекши и в едину реку у стены града слияся, еже есть Казань, и та река в Волгу пойдет, двемя устьи, за три версты выше града, по реце же той град словет Казань, и яко крепкими стенами и водами вкруг обведен бе град и токмо со единыя града с поля Арского приступ мал, но туда стена градная была в толстоту 7 сажен и прекопана около ея стремнина велия, глубока. И от сего казанцы, не мал себе притяжаша крепость, не бояхуся никого же...

П. С. Л., т. XIX, стлб. 119, 120.

 

 

© Copyright 2017. "Историческая библиотека"