§ 9. ВНУТРЕННЯЯ БОРЬБА ФЕОДАЛЬНОЙ ВЕРХУШКИ В ЗОЛОТОЙ ОРДЕ

Из Никоновской летописи

В лето 6799... Того же лета заратишася во Орде цари Тохта с Телебугою и Соолгуем, и одоле Тохта. Того же лета Ногой царь уби Телебугу царя и Саолгуя.

В лето 6802 царь Тахта сяде на царстве во Орде, а Ногоя царя ординскаго победи.

В лето 6849... Toe же осени умре царь Азбяк ординский, и сяде по нем во Орде на царстве сын его старейший Тинбек, и другой бысть сын его Чанибек, и уби брат своего меньшаго Хидырбека, и про то гневавшася на него старейший брат его Тинбек царь, Азбяков сын больший, и бысть вражда межу их...

В лето 6850. Царь ординский Чянибек, сын Азбяков, уби брата своего; большего Тинибека даря, а сам сяде на царствии, а преже сего убил меньшаго своего брата; и тако всею Ордою и всеми улусы и всеми землями властвоваше...

В лето 6856... князь Темирь ординский приходи ратью ко граду Алексину... и посад пожже, и со многим полоном возвратися во Орду... убиша бо его же слуги татарове во Орде того же лета...

Того же лета [6869] князь ординский темник Мамай воздвиже ненависть на царя своего, и бысть силен зело; и возста на царя своего на Темирь Хозю, Хидырева сына, и замяте всем царством его Воложским; и приат себе царя именем Авдула, и бысть брань и замятия велиа во Орде...

А царь Заволжский Темирь Хозя... убежа за реку за Волгу, и тамо убиен бысть, седев на царствии точию месяц един и седмь дний... И тогда князь Мамай во мнозе силе преиде за реку Волгу на горнюю страну, и Орда, вся с ним, и царь бе с ним именем Авдула. И тогда третий царь возста именем Килдибек, творяшеся сын Чанибека царя, внук Азбяка царя, и той добиваяся царства Волжьскаго, и многих поби, последи же и сам убиен бысть. И тогда мнозии князи сарайстии затворишася в Сараи, царя у себе именующе Амурата Хидырева брата царева; а Булат Темирь, князь ординский, Болгары взял, и все грады по Волзе и улусы поймал, и отня весь Воложский путь. А иный князь ординьский именем Тогай, иже от Бездежа, той убо Наручад и всю ту страну взял, и тамо о себе пребываше, а инии князи ординстии о себе пребываху. И бысть в них глад велий, и замятия многа, и нестроение всегдашнее, и не престаяху межи собою ратующеся, и биющеся, и кровь проливающе...

В лето 6870. Мамаю князю бысть бой велий со Амуратом царем о Волзе. Того же лета Амурат царь изгоном прииде на Мамая князя, и многих у него татар побил. Бысть в та времена на Воложском царствии два царя: Авдула, царь Мамаевы орды, его же князь Мамай темник устроил в своей Орде царя, а другий царь Амурат с саранскими князи. И тако те два царя и те две орде, мал мир имеюще, межи собою всегда во враждах и в бранех.

П. С. Л., v. X, стр. 168, 161, 212, 215, 220, 232, 233.

Из Львовской летописи

Приде ему [Мамаю] весть, яко некий царь идеть на них со востока, из Синие орды, Тахтамыш именем, поиде Мамай противу ему. Сретшеся на Калках, начашеся бити; и сшедше князи Момаевы с конь, подаша луки своя Тахтамышу и яшеся по нем, а Мамай то видев, побеже. А Тахтамыш посла за ним в погоню; он же прибежа х Кафе, тамо сослася по опасу и прияша его. Бе же с ним многа злата, и богатества, и сребра; кафинци же лесть сотвориша над ним, убита его. А царь Тахтамыш шед, взя Орду его, и царицы, и казну его раздели дружине своей. А на Русь к великому князю и ко всем князем русским присла послы своя, поведая им, како седе на царьство Волжеское, победив Мамая...

 

 

© Copyright 2017. "Историческая библиотека"