Из Никоновской летописи

В лето 6835. Прииде во Тверь посол силен зело царевич Щелкан Дюденевич изо Орды, от царя Азбяка; бе же сей братанич царю Азбяку, хотя князей тверских избита, а сам сести на княжении во Твери, а своих князей татарских хотя посажати по руским градом, а христиан хотяше привести в татарскую веру. И мало дней пребывшу ему во Твери, много зла сотворися от него Христианом; и приспевшу дню торжествену, а ему хотящу своя творити в собрании людей, уведев же сна князь велики Александр Михайлович, внук Ярославль, и созва тверичь, и вооружився, поиде на него; а Щелкан Дюденевич с татары противу его изыде, и съступишася обои въсходящу солнцу, и бишася весь день, и едва к вечеру одоле Александр, и побежа Щелкан Дюденевич на сени, и зажгоша под ним сени и двор весь княже Михайлов, отца Александрова, и ту згоре Щелкан и с прочими татары. А гостей ординских старых и новопришедших, иже с Щелканом Дюденевнчем пришли, аще и не бишася, но всех их изеекоша, а иных изстопиша, а иных в костры дров складше, сожгоша. Слышав же оиа, царь Азбяк ординский, и разгореся яростию велиею зело, и во мнозе скорби и печали бысть о братаниче своем Щелкане, и рыкаше, аки лев на тверских князей, хотя всех потребити, и прочее всю землю Русскую пленити, и посла на Русь по князя Ивана Даниловича Московъскаго. Того же лета во Орде убиен бысть князь Василей Рязанский повелением царя Азбяка. Toe же осени князъ великы Иван Данилович Московьский поиде ко царю во Орду [81] и тое же зимы прииде на Москву, а с ним царя Азбяка рать татарская и многие воеводы: Феодорчюк, Туралык, Сюга, и прочии князи ординстии, 5 темников великых [82], и князь Александр Васильевич Суздальский, и инде пишет, и с ним дядя его Василей Александрович, и идоша по повелению цареву, и взяша град Тверь, и Кашин, и прочиа грады Тверскиа, и власти, и села пожгоша, а люди в полон поведоша, и Тръжек и власти пусто сотворища, и хотяще ити к Новуграду, и не идоша; заступи бо его господь бог и святая Софиа, и оттуда послаша послы своя в Новъгород, они же убоявшеся, послаша к ним послы своя со многою честию, и со многими дары и 5000 рублев новгородцких. И тако татарове возвратишася оттуду со многим полоном и богатьством, и бысть тогда всей Русской земле велиа тягость, и томление, и кровопролитие от татар. Убиша же тогда и князя Ивана Ярославичя Рязанского, и много христиан избиша и плениша, точию съблюде и заступи господь бог князя Ивана Даниловичя, и его град Москву, и всю его отчину от пленениа и кровопролитиа татарского, и возвратишася татарове со многим полоном во Орду.

П. С. Л., т. X, стр. 194.

 

 

© Copyright 2017. "Историческая библиотека"